Макрадули на средба со „Спас за Валандово“ - Мора да се сочува животната средина

Добивај вести на Viber

Заменик-министерот за животна Јани Макрадули е првиот функционер кој ги прими активистите од „Иницијативата Спас за Валандово“ коишто се борат против изградбата на рудникот за  бакар во „Казандол“ поради стравувањето дека ќе има многу штетни последиците врз здравјето на жителите и животната околина.

„Ја споделуваме загриженоста на граѓаните на Валандово и ним им реков дека процедурите во коишто е стекната концесијата на овој рудник мора да се проверат, вели Макрадули.

Тој рече дека третманот на Македонија околу прашањата за животна средина  е комплетно на маргините иако станува збор за проблеми кои што ја одредуваат иднината и здравјето на луѓето.

„На Македонија итно и треба еколошки Прибе. Потребен е сериозен притисок од граѓаните кон институциите и мора да има пресвртница во третманот на животната средина на Македонија. Освен тоа, нашето општество се определи за патот на евроинтеграциите, а токму животната средина ќе биде најголемиот камен на сопнување во процесот на преговори бидејќи имплементирањето на европските стандарди е прашање кое таму се сфаќа сериозно и тоа е воедно и најскапото поглавје, вели Макрадули.

Активистите од иницијатавата велат дека очекуваат од институциите да покажат слух за овој проблем, а не да молчат.

„Баравме средби со многу функционери од оваа влада бидјеќи претходната воопшто не се заморуваше со некакви граѓани кои што имаат некакви проблеми со екологија. Впрочем тие ја дадоа спорната и штетна концесија во процедури кои беа се освен транспарентни и инклузивни кон граѓаните и нивното право да одлучуваат. Се надеваме дека оваа власт ќе има поголем ангажман и ќе ни помогне да се избориме за нашето право на здрав живот. Затоа бараме да се почитува волјата на граѓаните и претседателот на Советот на Валандово да го одобри референдумот за којшто ние собравме потписи“, вели Роберт Марков од иницијативата.