МАКЕДОНСКИОТ ТИМ ОД СУДСКА МЕДИЦИНА ПРИСУСТВУВА НА ОБДУКЦИИТЕ НА ЖРТВИТЕ: Директорот на Институтот д-р Станков за Фактор

Добивај вести на Viber

Директорот на Институтот за судска медицина, д-р Александар Станков, кој заедно со уште двајца колеги уште од вчера се во Софија за да се приклучат на бугарскиот тим вештаци во процесот на идентификација на 45-те жртви од тешката сообраќајна несреќа, денеска за Фактор потврди дека веќе имаат дозвола.

-Добивме дозвола и сега веќе присуствуваме на обдукциите на телата на загинатите во автобусот кој целосно се запали, посочи директорот Станков за Фактор.

Инаку, во текот на вчерашниот ден, македонските вештаци цел ден чекаа да влезат во салата во која се вршеа обдукциите, односно не им беше дозволен пристап се додека не добијат писмено одобрение од страна на бугарското обвинителство, иако, како што изјави д-р Станков дека и правилата на Интерпол налагаат учество на вештаци во вршењето обдукции од двете земји кога станува збор за меѓународна сообраќајна несреќа. 

Истовремено, д-р Станков потенцира дека процесот на идентификација се врши преку ДНК профил , заради што уште во текот на вчерашниот ден во Софија беа најблиските на загинатите за да дадат биолопки материјал.

Во однос на тоа кога може да се очекува да заврши идентификацијата, особено поради фактот што телата на загинатите патници се изгорени до непрепознатливост, д-р Станков посочува:

-Тоа зависи од нашите колеги од Бугарија. Ако се е како што треба, наредната недела треба да биде завршен целиот процес на идентификација на жртвите.

Инаку, експертите од областа на судската медицина појаснуваат дека кога станува збор за обдукции на карбонифицирани тела, дека тоа се крајно комплицирани и исклучително тешки постапки за идентификација на жртвите.

Анита Буховски