Македонската металургија продала „трошки“ во САД

Добивај вести на Viber

Според Митко Кочовски, претседател на Здружението на металургијата при Стопанска комора на Македонија, нашата металургија нема да претрпи ништо со рестриктивните мерки на САД за увоз на ќелик.

Кочовски напоменува дека нашата челична индустрија нема позначајни количества во структурата на американскиот увоз на челик и на ниеден начин не придонесува за гневот на американската администрација.

– Единствено „Макстил“ извезе минатата година 12.400 тони и ФЗЦ „Куманово“, кој води некои проговори за извоз, многу малку во однос на неговиот вкупен извоз и во вистинска смисла минорно во однос на вкупниот американски увоз во истиот период. Но и тие минимални количества не се за потценување кога е во прашање финансиската положба на компанијата. Значи, македонскиот извоз на челик на американскиот пазар на ниеден начин не влијаеше на загрозувањето на интересите на американската челична индустрија од конкуренцијата од странство – истакна Кочовски за Нова Македонија.

Што се однесува до Унијата, објаснува тој, таа е носечка комерцијална дестинација на македонските извозни капацитети во челичната индустрија кон кои е насочено над 60 отсто од нивното вкупно производство.

– Станува збор за нешто над 400 илјади тони вкупен извоз, топловалани и ладновалани лимови, бетонско железо и цевки. И што е уште позагрижувачко, нашата челична индустрија нема алтернативни пазари, кои би претставувале излезно решение во оваа ситуација – нагласува претседателот на Здружението на металургија.