Македонската, хрватската и бугарската берза ќе се поврзат со помош на ЕБОР

Добивај вести на Viber

Берзите во Македонија, Хрватска и Бугарија потпишаа договор за регионално поврзување и формираа заедничка компанија, а за ова добија грант од Европската банка за обнова и развој (ЕБОР). Грантот во висина од 540 илјади евра треба да им помогне на трите берзи да креираат електронски систем за прекугранично тргување. Дополнително, берзите во овој проект ќе вложат уште 80 илјади евра. „Ние, како Македонска берза, повеќе години наназад сме големи заговорници за креирање на некој тип на поцврсти регионални интерграции, а мотивацијата за тоа е дека автономните фактори за развој на нашиот пазар, имајќи ја во предвид лимитираноста на економијата се релативно ограничени и главниот двигател за раздвижување на пазарот го гледаме во проективно вклучување на странски портфолија на инвеститори“, вели Иван Штериев, прв човек на Македонската берза за хартии од вредност. Претставниците на хрватската и бугарската берза очекуваат дека кај инвеститорите од нивните земји има интерес за купување на акции во македонски компании. За половина година на Македонската берза се истргувани акции во вредност од 26,4 милиони евра. Најголем дел од прометот е направен во јануари годинава, а најслаб месец е април.