Македонците со „подлабок“ џеб ќе ја дочекаат Новата година на Малдивите, Сејшелите, Маурициус
Објавено во: Македонија 11 Декември, 2021
Малдиви, Сејшели, Маурициус, Египет, се дестинации на кои ќе отпатуваат дел од граѓаните за празниците.
Од туристичките агенции велат дека на прсти се бројат оние кои нудат патувања на егзотични места. Скопјани како и претходните години покажале најголем интерес за посета на далечни дестинации. Во внатрешноста, интересот е далеку послаб.
„Има луѓе кои сакаат да патуваат иако сме во време на пандемија. Ги бираат топлите краеви. За патувањето ќе треба да одвојат од 500 евра па нагоре по лице. Со примени вакцини против коронавирусот е овозможено да се патува“, велат од скопска туристичка агенција.
Во внатрешноста агенциите се со помал обем на работа. Објаснуваат дека бројот на семејства кои ќе заминат на некое егзотично место е мал. Имало интерес за посета на балканските дестинации, Будва, Дубровник, Атина, но поради промена на рестриктивните мерки, откажување на концерти на познати ѕвезди или пак воведување задолжителни тестови за мали деца, дел од луѓето се премислиле и се откажале од идејата да патуваат.
„Има стеснување на тој круг поради рестрикциите. Дел од повозрасните ќе заминат во бањите во Србија. Продадени се аранжмани за скијање во Банско и на Копаоник. Има некои кои прашуваат за патување на егзотични места, но досега не уплатиле. На крајот можеби само две до три семејства ќе заминат на подалечни места“, наведуваат од агенција во Битола.
Дел од гастарбајтерите за празниците ќе допатуваат во земјава, и одлучуваат 7 дена да бидат надвор од Македонија. Резервациите ги прават преку македонските туристички агенции. Интерес има и за посета на Турција, но претежно авионски, велат од агенциите, бидејќи постои резерва за патувањето со автобус, по автобуската несреќа која кон крајот на ноември се случи во Бугарија, каде настрадаа луѓе кои се враќале од Турција.
Ако ја погледнеме големата слика, за тоа како беше пред три и повеќе години, вработените во туристичките агенции се жалат дека по појавата на коронавирусот, нивната работа многу се намали.
Сања Атанасовскаfoto Wikipedia