Македонците се почесто одат на зимување на Копаоник и Златибор, а поретко во Банско
Објавено во: Македонија 26 Јануари, 2022
Македонските граѓани сезонава почесто одат на зимување во српските зимски туристички центри, а поретко во бугарските.
Од туристичките агенции велат дека голем број луѓе одат во сопствен аранжман, а оние кои резервираат аранжмани кај нив, ја бираат Србија пред Бугарија, затоа што северниот сосед имаше помалку рестрикции, додека источниот сосед често ги менува правилата за патување, и тоа ги одвраќа граѓаните. Во Србија, граѓаните најчесто одат на Копаоник и Златибор. За тоа дали политиката има влијание, мислењата се поделени.
„Изборот го прават врз основа на анти ковид мерките. Бугарија често ги менуваше правилата, и стресно е луѓето да чекаат до последен момент, за тоа дали ќе им треба или не негативен ПЦР тест. Србија имаше полабави мерки за патување цело време. Што се однесува до цените, тука некаде се и нема некоја драстична разлика. Политиката нема врска, затоа што тој што решил да оди на одмор не мисли на политика. Оние со подлабок џеб одат на зимување во Италија, а за разлика од претходно, за Австрија сега има многу мал интерес, затоа што и кај нив има рестрикции“, велат од скопска туристичка агенција.
Од агенцијата „Ариес“ од Битола објаснуваат дека поради пандемијата, и лошата економска состојба на граѓаните, има многу помал интерес за зимување од порано, но точно е дека оние кои одат на зимски одмор, и даваат предност на Србија.
„Цените се покачени и во Бугарија и во Србија. И ски картите чинат поскапо. Дел од хотелите во Копаоник имаат заземено политика за аранжмани од 7 ноќи. Граѓаните одат на Копаоник, Златибор и Стара Планина. Во Банско во Бугарија сезоната е слаба. И политиката како фактор предизвикува одредени чувства кај граѓаните“, додава Никола Митревски од „Ариес“.
Од други туристички агенции во внатрешноста велат дека граѓаните бираат дестинации според своите финансиски можности, и ги планираат зимските одмори, следејќи ги рестрикциите во соседството. Оние на кои Копаоник им е скап, го бираат Златибор, а има и такви кои чекаат кон крајот на месецот да се олабават рестрикциите во Бугарија и да заминат во Банско.
Кирил Лазаров, претседателот на Македонско – бугарската стопанска комора, неодамна изјави дека Македонците сѐ повеќе се определуваат да ги заменат бугарските со српските зимски туристички центри поради политичката блокада од Бугарија.
Со договорот за добрососедство потпишан со Бугарија требаше да се подобри и туристичката размена.
Според последните податоци за туризам кои ги објави Државниот завод за статистика (ДЗС) во ноември лани во земјава имало 923 бугарски туристи, кои реализирале 1.655 ноќевања.
Сања Атанасовскафото Википедија