Мајор Ѓуров: ЕУ да ја откачи Бугарија
Објавено во: Македонија 18 Септември, 2020
Мајорот во АРМ, Лазар Ѓуров, објави статус во кој вели дека Европската унија треба целосно да го отгрли Меморандумот со кој Бугарија бара од Брисел да се разгледаат националните обележја на Македонија пред да започнат преговорите со Скопје на крајот од годината.
Бугарија испрати Меморандум до земјите-членки да се разгледа ова прашање со Македонија, а засега од македонското МНР тврдат дека тоа е неофицијален нон-пејпер во унилатералната комуникација.
„Единствен легитимен одговор од ЕУ за забеганите барања на официјална Бугарија би бил:
"Донесовме одлука да ја напуштите ЕУ. Вие не ги живеете европските вредности туку ја злоупотребувате позицијата за уценување и лажење.
Ајде преместете се на другата страна од вратата!"
Не за џабе го третираат Балканот како слепо црево на Европа. Па тоа е. Исфрустрирани народи кои постојат само на база на негирање на другиот. Народи кои не можат да си се помират со историјата, да ја признаат сегашноста и да живеат со меѓусебно почитување и во мир.
Секој со свои историски филмови во кои другиот не постои.
Далеку е свеста на европејците кои признаваат факти, се извинуваат и се фокусираат на иднината....заедничката!
Туку булингот е регионален спорт. Од индивидуално до државно ниво.
Ќе треба гоооодини и гоооодини за да еволуираме“, напиша д-р Ѓуров, мајор од Воената академија и предметен наставник по предметот Комуникации и комуникациски вештини.