KOЅИАС НЕ ПОПУШТА: Новата влада имала пријатески тон, но тие не отстапуваат

Јужниот сосед не го менува ставот за приемот на Македонија во НАТО и ЕУ и покрај притисоците што се очекуваат од Европа за ова прашање.

Коѕиас вчера во говор во Кожани на настан организиран од неговото политичко движење „Прато“ на само три дена пред средбата со новиот македонски колега,  Никола Димитров индиректно порача дека грчката Влада не отстапува од своите ставови и нема да потклекне под притисоци за прием на Македонија во НАТО под времената референца, како што интензивно периодов се слуша од различни политички и медиумски извори и во двете држави.

„Сега кога работите се стабилизираа повторно ќе дојдат некои (европски политичари) и ќе кажат: ‘За да ја стабилизираме дополнително државата да  ја внесеме во НАТО и ЕУ?’. Ние немаме ништо против, но треба тие да ги одржат нивните обврски, што значи дека треба да престанат со иредентизам и да направат компромис во спорот за името“- изјави Коѕиас во Кожани.

Вели дека е рано да се зборува дали двете држави се поблиску до решение за името. 

„Во среда доаѓа министерот за надворешни работи на БЈРМ за да дискутираме за тоа како можеме да ги развиеме нашите врски, имаме предлози за дополнителни мерки за градење доверба и да дискутираме за тоа како може да разговараме за спорот за името. Нема да зборуваме за името, туку ќе зборуваме за методот“- кажа  Коѕиас.

Според Коѕиас, новите изјави на македонската влада кон Грција имаат пријателски тон, но од разговорите ќе се процени дали тој е суштински, или пак е само обид да се олеснат работите бидејќи македонската влада смета дека без промена на името може да влезе во меѓународните организации.

Коѕиас додаде дека македонските политичари мора да ги прифатат европските вредности и да покажат култура на компромис.

Коѕиас вели дека Грција сака Македонија да биде стабилна и поради тоа и работи на мерки за градење на доверба со неа. Доколку Македонија не е стабилна, истакна дека некои други соседни држави би можеле да предизвикаат дополнители проблеми и дестабилизација во регионот.