Корупцијата правило на игра, секој 5ти Македонец е корумпиран
Објавено во: Економија 25 Септември, 2015
Над 300 илјади случаи на корупција има во Македонија на годишно ниво, без разлика дали се работи за давање или примање готовина или подароци.
Ова го покажуваат податоците од истражувањето на јавното мислење за корупција во Македонија.
Во новиот проект на Транспарентност Македонија ,,Студиите на случаи и ризици од корупција" се анализира и вклученоста на граѓаните во случаите на корупција, а не само политичките елити.
,,Истражувањето покажува голема вклученост на граѓаните во корупцијата, бидејќи поради воспоставениот систем, голем дел од нив давањето или примање мито го прифаќаат како правило на игра, особено во области како судството, образованието или здравство," - вели Миша Поповиќ дел од тимот на истражувањето.
Дека народот отрпна и се навикна на корупцијата, покажуваат и податоците од истражувањето ,,Демографија на корупција" .
Студијата покажува дека секој петти граѓанин на Македонија, на еден или друг начин подмитил јавен службеник во 2013 година.