КОНЕЧНО ОБЈАВЕН И ИМОТНИОТ ЛИСТ НА СЛАВИЦА ГРКОВСКА - вицепремиерката има стан во Скопје, накит, кредит, а еве и каква е состојбата на штедните книшки

Добивај вести на Viber

Поминаа дури девет месеци откако е избрана на престижната владина позиција вицепремиерка задолжена за политики за добро владеење, а дури деновиве на веб страницата е објавен имотниот лист на владината потпретседателка Славица Грковска.

Што поседува вицепремиерката?

Ако се погледне нејзиниот анкетен лист, во кој се објавени дури и најминималните имоти што таа ги поседува, може да се види дека Грковска располага со еден стан во Скопје, а има и земјоделско земјиште, балкон, но и помошни простории. Интересно е дека Грковска поседува и благородни метали, уметнички и колекционерски предмети, а има и една судска пресуда во нејзина корист. Таа има и трансакциски сметки, девизни и денарски штедни книшки, но, има и долгови, односно една кредитна картичка, како и еден кредит.

Грковска се што навела во имотниот лист е нејзин личен имот, со исклучок само на една трансакциска сметка, за која е наведено дека е имот на нејзините родители.

Да одиме со ред со каков имот располага вицепремиерката која е ангажирана на политики за добро владеење, додека претходно таа функција се викаше вицепремиер задолжен за борба против корупцијата, и ја вршеше сегашниот министер за земјоделство Љупчо Николовски.

Од повредниот имот на Грковска може да се издвои еден стан од 52 метри квадратни во Скопје, за кој е наведено дека датира од 2007 година. Овој стан е купен, односно како што е наведено во имотниот лист, е стекнат со договор за купопродажба. Станот вреди 4,9 милиони денари, што е рамно на 80 илјади евра.

Интересно е што Грковска навела дека поседува балкон од два метри квадратни во Скопје, стекнат со договор за купопродажба, а за кој вредноста не е наведена. Балконот е личен имот, а личен имот е и земјоделското земјиште во Куманово од 675 метри квадратни, од 2016 година, стекнато со договор за подарок, и чија вредност не е наведена.

Во Скопје, пак, Грковска поседува и помошни простории од 8 метри квадратни, исто така купени односно стекнати со договор за купопродажба, а нивната вредност не е наведена.

Стекнати со договор за купопродажба се и нејзините благородни метали, односно накитот, како и уметничките слики, од кои и двете колекции вредат по 124 илјади денари, односно по 2.000 евра или вкупно 4.000 евра, а и едните и другите се стекнати со договор за купопродажба.

Грковска како личен имот навела дека поседува и судска пресуда во нејзина корист од 2016 година, на сума од 115.797 денари или околу 1.900 евра.

За трансакциската сметка која е единствената која е имот на родители, не е наведено на кој износ е таа сметка.

Таа има две девизни книшки и тоа едната и тоа на едната штеди евра на сума од 20.400 евра, додека, пак, интересно е што втората и е на британски фунти, иако станува збор за помала сума од 568 фунти. Има и книшка во долари, и тоа 638 долари.

Вицепремиерката за добро владеење поседува и денарска книшка и тоа на сума од 3,7 милиони денари, што би било рамно на 60.500 евра.

Има и една трансакциска сметка од 889 илјади денари.

Грковска има и долгови. Во нејзиниот имотен лис се наведени кредитна картичка од 120 илјади денари, а таа има и кредит од 9.000 евра.

Фактор своевремено ја праша Антикорупциската комисија зошто толку доцни со објавувањето на имотот на Грковска, а оттаму ни рекоа дека причина е слабиот капацитет со кадар на оваа институција, додека, пак, самата Грковска во интеррвју ни изјави дека таа навреме и согласно законските рокови ги испратила до ДКСК податоците за имотната состојба.