Конечно е објавен податокот: Колку странски инвестиции влегле годинава?
Објавено во: Економија 31 Мај, 2018
Вкупно 235 милиони евра вредат странските директни инвестиции кои влегле во земјава во првите три месеци годинава. Бројките покажуваат дека во јануари, февруари и март годинава влегол поголем странски капитал отколку во целата мината година кога како странски директни инвестиции беа впишани 227 милиони евра. Од оваа година Народната банка ги објавува податоците за странските директни инвестиции на квартално ниво, па така ова е прв податок за странскиот капитал годинава. Претходно, во минатите години, податоците беа месечни.
Ако се анализира по месеци пак, годинава најголем странски капитал влегол во февруари кога странските директни инвестиции изнесуваат 102,5 милиони евра. Во јануари се 65,5 милиони евра, додека во март биле безмалку 67 милиони евра.
Сумата за странските директни инвестиции во првиот квартал ветува дека ова може да биде добра година ако се анализира по вредноста на влезениот странски капитал. Сепак сумите зависат и од временски флуктуации, односно да бидат различни во различна сезона.
По години, во 2017 година влегле вкупно 227,5 милиони евра. Претходна 2016 година странските директни инвестиции изнесуваат 338 милиони евра, додека во 2015 година се само 216 милиони евра. Во 2014 година странските директни инвестиции се само 2015 милиони евра.
А.Т.