Добивај вести на Viber
Словенија остро реагира на тендерот за истражување и експлоатација на нафта од дното на Јадранското Море што го објавија хрватските власти. Проблем се географските карти со кои се опишуваат локациите кои им се нудат на инвеститорите.
Словенечкото Министерство за надворешни работи ја повикало на консултации хрватската амбасадорка во Љубљана за да и предочи дека документацијата која Хрватска ја навела во јавниот повик за барање нафта се однесува токму на подрачјето во северниот дел на Јадранското Море, кое е предмет на граничен спор меѓу двете соседни земји.
Словенија потсетува дека членот 10 од арбитражната спогодба меѓу Загреб и Љубљана бара од двете страни да постапуваат „во добра вера“ и да се воздржуваат од постапки или изјави кои би можеле да ги заострат односите или да ја загрозат работата на арбитражниот суд кој решава за територијалниот спор.
Официјална Љубљана бара од Хрватска од конкурсот веднаш да го повлече полето за доделување концесии СЈ-01, кое се однесува на подрачјето северно од 45 степени и 10 минути географска ширина, каде што се наоѓа словенечкото територијално море и епиконтинентален појас. Словенија наведува дека токму овој простор е предмет на арбитражниот спор и беше причина за Љубљана извесно време да го блокира пристапувањето на Хрватска во ЕУ.
Во истовреме, Словенија бара од Хрватска на мапите за тендерот јасно да наведе дека ова подрачје е предмет на арбитражна постапка.