Колку Македонци работат од дома?
Објавено во: Економија 28 Септември, 2018
Програмери, веб
дизајнери, архитекти, дактилографи, преведувачи, ова се само дел од професиите
кои својата заработка ја вадат во сопствениот дом. Во последно време, со
развојот на информатичките технологии, се почести се примерите на луѓе кои
своите работни обврски можат да ги извршуваат во домашна атмосфера наместо да
одат во канцеларија или фабрика. Според бројките од Евростат, во 2017 година, речиси
13.000 лица или само 1,7 отсто од сите над 750.000 вработени во земјава работеле
од дома.
Иако во оваа категорија заостануваме зад европскиот просек, сепак, може да се пофалиме дека сме подобри од некои соседни земји. На ниво на 28- те земји членки на Унијата во 2017 година, овој процент изнесува 5 отсто од вработените лица на возраст од 15 до 64 години. Оваа бројка е највисока во Холандија (13,7 отсто), потоа Луксембург (12,7 отсто) и Финска ( 12,3 отсто), а најниска во Бугарија (0,3 отсто) и Романија (0,4 отсто). Во Грција процентот на вработени кои работат од дома е 2,3 отсто, во Хрватска 1,4 отсто, а во Словенија 7,2 отсто. Работата дома е малку почеста во еврозоната (5,7 отсто од вработените лица) отколку во ЕУ како целина.
Според европските статистички податоци, самовработените лица повеќе сакаат да работат од дома (18,1 отсто) за разлика од тие што се вработени кај некој работодавец (2,8 отсто).
Исто така, според бројките за 2017 година, на ниво на ЕУ поголем е бројот на жените кои работат од дома (5,3 отсто) во споредба со мажите (4,7 отсто). Меѓутоа, во неколку земји-членки, ситуацијата беше обратна, со повеќе мажи кои работат од дома отколку жени. Ова е карактеристично за Холандија (14,7 отсто од мажите, во споредба со 12,6 отсто од жените) и за Данска (9,5 отсто во споредба со 7,6 отсто).
Статистиката открива дека зачестеноста на работа од дома се зголемува со возраста. Само 1,6 отсто од 15- 24-годишници во ЕУ обично работеле од дома во 2017 година. Во возрасната група од 25 до 49 години овој процент изнесува 4,7 отсто, а највисок е кај вработените на возраст од 50-64 години (6,4 отсто). Највисок процент на млади луѓе од 15 до 24 години, кои редовно работеле од дома, е забележан во Луксембург (10,4 отсто), а на второ место е Холандија со 4,2 отсто. За другите возрасни категории, Холандија е на врвот (14,8 отсто од 25- 49 години и 16,6 отсто од 50-64 години), по што следи Финска (13,1 и 13,6 отсто).
Во последниве години се забележува тренд на зголемување на процентот на вработени лица кои понекогаш работат од дома, од 7,7 отсто во 2008 година на 9,6 отсто во 2017 година, иако бројката во 2017 година беше малку намалена од 2016 година (9,8 отсто).
(М.Б.)