Колкава дивиденда носи акцијата на „Макпетрол“?
Објавено во: Економија 31 Мај, 2018
„Макпетрол“ планира да исплати по 961 денар бруто дивиденда по акција или вкупно 108 милиони денари. Најмногу пари ќе добие транспортната компанија ОИЛКО, а над 2.400 акционери ќе поделат 1,1 милиони евра. За истакнување е тоа што „Макпетрол“ на свои вработени ќе подели награди во износ од 600.000 евра!
Најголемата трговска компанија во земјава , нафтениот гигант „Макпетрол“ ќе подели 108 милиони денари во дивиденда на своите акционери, пишува во предлог одлуката за претстојното акционерско собрание што ќе се најде на гласање на 9 јуни за кога е закажано акционерското собрание.
Од објавените податоци произлегува дека дивидендата по акција ќе изнесува 961 денар во бруто износ, кога вкупниот број на акции со право на глас ќе се подели со планираниот износ на дивиденда. Во предлог одлуката не е специфицирано, но се подразбира дека станува збор за бруто износ, а тоа подразбира дека износот треба да се намали уште за 10 отсто колку што е персоналниот данок што компанијата треба да го издвои за секоја акција на која следува дивиденда. Во тој случај домашните физички лица акционери односно инвеститори во акции на „Макпетрол“ можат да очекуваат 865 денари дивиденда по акција. Во однос на последната пазарна цена на таа акција тоа е принос од 2,8 отсто на вложеното и не е меѓу најатрактивните приноси кои се остваруваат од дивиденда од понудата акции кои можат да се одберат на нашата берза за хартии од вредност. Најмногу пари од дивиденда ќе добие најголемиот акционер ОИЛКО кој поседува 22,9 отсто од акциите што значи дека ќе добие бруто износ од 24,7 милиони денари. Над 2.400 домашни физички лица – акционери во „Макпетрол“ меѓу себе ќе поделат 1,1 милиони евра од добивката на компанијата наменета за дивиденда. Од добивката за 2016 година „Макпетрол“ исплати дивиденда од 1.000 денари за акција.
„Макпетрол“ за награди на вработени ќе подели над 600.000 евра!
Во предлог одлуката која се однесува на дивиденда на „Макпетрол“ пишува дека се планира пари за награди на членови на управниот одбор, на раководни лица и на вработени. Интересно е тоа што најмногу пари се планирани за награди на вработените лица и тоа е износ од 37 милиони денари односно околу 600.000 евра. „Макпетрол“ има над 1.000 вработени и не е прецизирано колкумина ќе добијат награда и тоа ќе биде уредено дополнително со одлука на органот на управување најверојатно по примени предлози за вработени кои се истакнале со работниот ангажман. Ова е навистина позитивен пример на работење и може да се истакне како корисна пратика во корпоративното управување.За членовите на Управниот одбор на компанијата во предлог – одлуката се наменети 9 милиони денари, а компанијата има 8 члена на УО што значи дека просечно на секој би му биле исплатени над 1,1 милиони денари. „Макпетрол“ предвидува награди и за раководниот кадар во компанијата и за таа намена се планирани 2,25 милиони денари.
Р.Ф.