Која е Cemdag Lightning Europe компанијата која влегува во ТИРЗ Скопје?
Објавено во: Економија 05 Јануари, 2018
Владата не вчерашната седница се пофали дека потпишале договор за прва браунфилд инвестиција во ТИРЗ Скопје 1 со влез на турската компанија Cemdag Lightning Europe која треба да отвори 100 нови работни места и да инвестира 5 милиони евра.
„Владата донесе одлука за согласност на Договорот за долготраен закуп на градежно земјиште во Технолошко индустриската развојна зона Скопје 1, со Друштвото за трговија, услуги и производство Џемдаг Лајтинг Еуропа. Ова е прв договор за гринфилд инвестиција според критериумите од новиот План за економски раст кој беше промовиран непосредно пред Нова Година, вреден 5 милиони евра, и предвидува 100 нови вработувања“ соопштија од Владата на РМ.
Cemdag Lightning Europe е турска компанија основана во 1968 година, а има главно седиште во Измир како и оперативни во најголемите турски градови како Истанбул, Анкара и Бурса.
Cemdag Lightning Europe според јавно достапните информации има 3 фабрики за производство кои се распрострираат на површина од 41.000 метри квадратни, и е лидер на турскиот пазар за осветлување.
Компанијата Cemdag Lightning Europe произведува светилки за улично осветлување, рефлектори, големи системи за осветлување, производи за индустриско и осветлување на деловен простор и системи за домашно осветлување. Cemdag Lightning Europe тврдат дека воведуваат постојани иновации и вложуваат многу во развој и истражување.
Засега од компанијата официјално не ја потврдиле веста за влез во Македонија на нивната службена веб страна.
Владата предводена од коалицијата на СДСМ се заложи за еднаква поддршка на домашните и странските инвеститори, како и откривање на сите услови во договорите кои претходното раководство ги склучуваше со компаниите кои инвестираа во зоните за да се утврдат сите трошоци и ефекти од вложувањата.
Затоа сега ќе очекуваме и објавување на детали од договорот на Владата со Cemdag Lightning Europe.
Автор: Христијан Станоевиќ