Кој заработи најмногу за време на ураганот Сенди?

Добивај вести на Viber

Додека ураганот Сенди беснееше низ источното американско крајбрежје, а прекинот на електричната енергија го парализираше сообраќајот во Њујорк и околината, американскиот претприемачки дух се покажа во најдобро светло. Џовани Ернандез, специјалист за кастрење дрвјата кој работи во Њу Џерси, во интервју за локалните медиуми изјави дека луѓето полуделе по неговите услуги и тој добивал по стотици телефонски повици поради искршени гранки и соборени дрвја во приватните имоти. „Луѓето сакаат да дојдеме веднаш, но ние не можеме да стигнеме до нив затоа што сите далноводи сеуште се на земјата", вели Ернандез. Во средата, првиот ден по бурата, кога луѓето се обидуваа да се вратат на вообичаеното секојдневие, многу сопственици на продавници и улични трговци го продолжија времето на работење за да извлечат максимум од оваа ретка можност за бизнис. Лошите вести за сопствениците на куќите станаа одлични вести за градежните фирми и за трговците на мебел, од кои многумина имаа тешкотии во изминатите години кога продажбата на куќи во САД опадна, а невработеноста се зголеми, коментираат од Ројтерс. Бензинот и генераторите за струја биле најбараните стоки во целиот регион, а поради бурата поскапеле и вообичаени работи како кафе и колачи. Поголемите синџири на маркети во регионот исто така се обиделе да привлечат клиенти за време на ураганот и веднаш потоа. „Barneys“ во Њујорк организирале распродажба под мотото „Вратете се на вообичаениот ритам на живот, но со стил", која започнала откако ветрови на Сенди се смириле. Било објавено дека на попуст се  јапонскиот зелен чај за смирување, како и комплетот игри на табла. Некои луѓе пак се свртеле кон алкохолот, а оваа можност ја искористил сопственикот на продавница за вина и алкохолни пијалоци во Бруклин кој отворен дури и во неделата, за време на најсилниот удар на ураганот. „Неделата ни беше најголемата побарувачка годинава. Продажбата беше исто толку добра како на Бадник минатата година", се пофали менаџерот на продавницата Бен Розентал.