Кој „танкира“ 150.000 евра во акции на „Макпетрол“?
Објавено во: Економија 02 Февруари, 2017
За некои инвеститори последниве блок трансакции се
сигнал дека „Макпетрол“ можеби ќе дели добра дивиденда и дека заради тоа сега
веројатно доброупатените купуваат...
Во осум блок трансакции во два трговски дена беа
истргувани 342 акции на најголемата македонска компанија за малопродажба на
нафтени деривати „Макпетрол“. Во двата трговски дена (27 јануари и 1 февруари)
во вкупно осум блок трансакции беа истргувани 57 отсто повеќе акции одошто беа
истргувани во класично тргување во текот на целиот јануари. Цената по која се
тргуваа акциите во блок трансакциите се движеше од 25.696 денари до 27.000
денари за акција и тоа е многу блиску до ценовното ниво по кое вообичаено се
тргуваше таа акција и во класично тргување во истиот период.
Инвеститорската јавност со внимание ги следи случувањата околу „Макпетрол“
особено сега кога треба да се објави последниот финансиски извештај во кој ќе
ги има и податоците за четвртиот квартал и по што ќе може да се прават проекции
и предвидувања за дивидендата што ќе следи од работењето за 2016 година. А
сосема е извесно дека дивиденда ќе има затоа што менаџментот тоа недвојбено го
истакнуваше во образложенијата кон кварталните финансиски извештаи во текот на
2016 година.
Трендот на тргување со акциите од „Макпетрол“ продолжува и јакне, се чека
добра дивиденда?!
Акцијата на „Макпетрол“ подолго време се одржува околу ценовното ниво кое беше поставено и во намерата на странската компанија за превземање на „Макпетрол“. Очигледно дека оваа акција е посакувана кај пошироката инвеститорска јавност, а веројатно и заради тоа во ноември ОИЛКО командитното-друштво кое има сопственичко-сопственички односи со „Макпетрол“ објави дека во ноември во неколку наврати преку блок трансакции купил 676 акции во „Макпетрол“. Овие факти ги потврди „Макпетрол“ со објавите на берза во два наврати на 18 ноември и на 2 декември дека ОИЛКО докупувал акции во „Макпетрол“. За многумина во нашата инвеститорска заедница купувањето на ОИЛКО може да е резултат на потенцијалниот повик за непријателско превземање на „Макпетрол“ од странска компанија иако тоа е неизвесно, но не и невозможно. Но и во тоа нашите инвеститори гледаат сигурен знак дека „Макпетрол“ годинава за лани ќе подели солидна дивиденда и тоа заради две причини: прво да ги одоброволи многубројните вработени-мали акционери и второ за да надоемсти дел од парите што ОИЛКО ги вложи во ноември во купување акции на „Макпетрол“. За потсетување, ОИЛКО во ноември вложи половина милион евра во акции на „Макпетрол“. Од трендот на купување акции во ноември некои инвеститори изведуваат заклучок дека и оваа „тура“ блок трансакции може да одат на конто на ОИЛКО или евентуално на сметки на менаџери во компанијата.
Р.Ф.