Кој Македонец зема 1,1 милиони евра од дивиденда?
Објавено во: Економија 06 Јуни, 2018
Големата тројка ја сочинуваат Самарџиоски од „Прилепска пиварница“ со 1,12 милиони евра, Доне Таневски од „Македонијатурист“ со 262.466 евра дивиденда и Душан Пецовски најголемиот акционер во „Реплек“ со 200.000 евра дивиденда
Најголемиот акционер во најголемата домашна пиварница „Прилепска пиварница“ од дивиденда ќе добие 1,12 милиони евра и со тоа Кирил Самарџиоски, долгогодишниот успешен директор и актуелен претседател на Управниот одбор е најдобитниот акционер во конкуренција на 12 домашни физички лица.
Самарџиоски, поседува 62,63 отсто од акциите со право на глас во „Прилепска пиварница“ односно 25.000 акции со право на глас. За добивката од лани пиварницата издвои 2.775 денари дивиденда, а Самарџиоски има 69,37 милиони денари дивиденда односно 1,12 милиони евра.
Втор на листата најдобитни акционери е најголемиот поединечен акционер на „Македонијатурист“ и долгогодишен прв човек на најголемата хотелиерска компанија – Доне Таневски. За неговите 19,18 отсто од акциите во „Македонијатурист“ Таневски ќе добие 16,22 милиони денари односно 262.466 евра. Третото место е резервирано за најголемиот акционер во „Реплек“ , Душан Пецовски кој за своите акции ќе инкасира дивиденда од 199.800 евра.
По него на листата најдобитни акционери се другите два големи акционери во „Реплек“: Славица Туџарова Трајковска и Иван Туџаров. Туџарова – Трајковска ќе инкасира нето над 194.000 евра, а нејзниот брат Иван 191.590 евра.
Следна на листата е втората по големина акционерска во „Македонијатурист“ Соња Бибановска за своите 11,27 отсто од акциите ќе земе 154.230 евра.
Најголемите акционери во „Гранит“ сестрата Ивана Милковска –Симева и братот Зоран Милковски. За Ивана има 105.200 евра и Зоран 103.070 евра.
Последната тројка ја сочинуваат најголемите поединечни акционери во: „Тетекс“, „Витаминка“ и во ОИЛКО. Глигорие Гоговски ќе добие 94.000 евра од неговите 12,76 отсто во „Тетекс“, Симон Наумоски од „Витаминка“ ќе добие 57.090 евра, а Андреја Јосифовски за неговите акции во транспортната компанија ОИЛКО ќе добие 52.070 евра.