Кои се добри, а кои лоши вести во „Фершпед“?

Добивај вести на Viber

Во првиот квартал најзначајна позитивна вест за акционерите е тоа што трошокот за камати е намален за 40 отсто во споредба со истиот период лани и компанијата за камати платила 45.000 евра помалку. Сепак заради рапидниот скок на оперативните трошоци, добивката за прв квартал е помала за 34.500 евра од истиот период лани.

Приходот од продажба на „Фершпед“ во првиот квартал годинава пораснал за 2 милиони евра во споредба со резултатот остварен во истиот период лани, покажуваат официјалните податоци од неконсолидираниот биланс на успех на најголемата шпедитерска компанија во земјава. Тоа е една од двете добри вести во билансот на компанијата, која за жал нема позитивно влијание врз нето ефектот (добивката) на компанијата која е пониска во споредба со добивката остварена лани.

Приходите и расходите рака под рака одат!

Приходот од продажба во првиот квартал годинава е 699,5 милиони денари и е за 21 отсто односно 121,2 милиони денари повисок од реализацијата лани. Компанијата бележи зголемување на пазарните позиции во однос на лани дома и на странски пазари. На домашниот пазар приходот е поголем од 10,5 милиони евра односно 640,6 милиони денари и во однос на лани е зголемен за 15 отсто. На странските пазари компанијата остварила раст од 167 отсто односно приходот изнесува 58,6 милиони денари и во однос на 2016 година е поголем за 36,7 милиони денари. Вкупните оперативни приходи на компанијата изнесуваат 704,65 милиони денари. Паралелно и речиси во иста мерка растат и оперативните расходи на компанијата. Тие годинава за првите три месеци изнесуваат 699,1 милиони денари и во однос на лани се зголемени за 112 милиони денари односно за 19 отсто. Трошокот за набавна вредност на трговски стоки пораснал за 50 отсто до износ од 146,5 милиони денари, а трошокот за услуги со карактер на материјални трошоци пораснал за повеќе од 1 милион евра до износ од 464,1 милиони денари. Оперативната добивка на компанијата изнесува 5,57 милиони денари и во однос на лани е намалена за 4,1 милиони денари односно за 42 отсто.

Најважна добра вест: речиси преполовен трошокот за камати

Компанијата има добра стратегија за кастрење на трошоците од камати. За таа стравка од финансиските расходи „Фершпед“ платил 40 милиони денари (околу 65.000 евра). За таа намена во истиот период лани компанијата платила 110.000 евра). Ова е резултат за почит без разлика дали станува збор за репрограм на обврски со нови значајно пониски камати или пак станува збор за значајна отплата и намалување на основицата на која се плаќаат каматите.
Сепак заради значајното зголемување на оперативните трошоци компанијата во првиот квартал бележи добивка од 1,25 милиони денари односно 20.000 евра. Во споредба со лани добивката бележи пад од 63 отсто односно 2,1 милиони денари помалку.