Кочо Анѓушев го превзеде кормилото на „Феро Инвест“

Добивај вести на Viber

Досегашниот вицепремиер за економски прашања Кочо Анѓушев од вчера е запишан како нов управител на компанијата „Феро Инвест“ на местото на досегашниот раководител Ратко Ѓорѓиевски.

Анѓушев својата функција на чело на оваа компанија ја стави во мирување додека ја извршуваше владината функција, по што реши да се повлече со истекот на првиот мандат на 3 јануари, а неговата позиција ја превзеде Мила Царовска, дотогашната министерка за труд и социјална политика. Машинскиот професор и претприемач рече дека во моментов поважно му е да го консолидира работењето на своите фирми отколку политиката.

Клучната компанија околу која се вртат бизнисите на Анѓушев е „Феро Инвест“ во која тој е ко-сопственик заедно со неговиот брат Тодор Анѓушев и со Никола Гравчев. „Феро Инвест“ е ко-сопсвеник во машинската индустрија “Брако“ заедно со велешката фирма „Тргофер“.

„Феро Инвест“ во 2018 година остварил приход од 3,1 милиони евра и профит од 1,3 милиони евра. Оваа компанија е веројатно најголемиот ко-сопственик на мали хидроелектрани во земјава. Таа е ко-сопственик на 8 компании кои управуваат со мали хидроелектрични централи кои лани оствариле вкупен приход од 3,7 милиони евра и имаат кумулативна добивка од 316.000 евра (само една од нив годината ја завршила со загуба од работењето).

Тој исто така се пожали дека дел од неговите компании имаат намалени добивки бидејќи не учествуваат на државни тендери, тој не е присутен за да учествува во креирање и водење на економските политики и дека дел од соработниците избегнуваат нови договори плашејќи се дека е владин функционер. 

„Најпрво да кажам дека некои од компаниите каде што имам удели имаат пад од 50 отсто во профитот. Како прво тие не учествуваат на тендери и не добиваат државна помош, потоа други деловни партнери не сакаат да соработуваат затоа што се плашат бидејќи јас сум владин функционер и на крај, јас отсуствувам и не сум таму за да ги креирам економските политики“, изјави во една прилика Анѓушев. 

За јавноста спорно беше учеството на „Феро Инвест“ во јавна набавка на АД ЕСМ за јавната набавка за транспортни ленти за РЕК Битола во 2017 додека Анѓушев беше член на Владата. „Феро Инвест“ не го доби милионскиот тендер, но нагласи дека ќе учествува во јавни набавки ако тоа е од нејзин интерес, иако е 95-отсто извозно ориентирана.

А.К.