ЌЕ СТАНАТ ЛИ РЕВИЗОРИТЕ „ПОВИДЛИВИ“ – Се крчка нов Закон за државна ревизија
Објавено во: Македонија 18 Април, 2023
Зголемена транспарентност, подобро следење на резултатите од ревизиите, како и поголема финансиска независност за државните ревизори. Ова се дел од целите кои треба да се постигнат со новиот Закон за државна ревизија. Со него, како што нагласуваат предлагачите, се цели кон дополнително усогласување и подобрување на функцијата на надворешната ревизија во јавниот сектор, како и воспоставување редовен и ефикасен механизам за разгледување на конечните ревизорски извештаи од страна на Собранието следејќи ја најдобрата пракса од областа кај земјите во Европската унија.
Новиот Нацрт законот за државната ревизија изработен од Министерството за финансии треба да ја издигне институционално организациската поставеност на Државниот завод за ревизија на ниво на Врховна ревизорска институција. Истовремено се цели и кон независност на Државниот завод за ревизија во однос на раководење на институцијата, како и пропишување на постапката за избор на главен државен ревизор и заменик главен државен ревизор пред Собранието.
Меѓу одредбите во новиот закон се тежнее и кон објективност при вршење на државната ревизија врз основа на неограничен пристап до информации преку обезбедена целосна и потполна финансиска и сметководствена документација.
- Максимална транспарентност во известувањето преку доставување на конечните ревизорските извештаи до Собранието и до органите надлежни за надзор на работењето на правното лице кое е субјект на ревизија. Подобрување на системот за следење на имплементацијата на дадените препораки преку зголемување на публицитетот и транспарентноста на резултатите од ревизијата во однос на спроведувањето, односно неспроведувањето на дадените препораки и доставување на извештаите за преземените мерки по однос на препораките до Собранието и отстранување на влијанието на другите државни органи и институции од јавниот сектор врз работењето на Државниот завод за ревизија со обезбедување финансиска и организациска независност - се истакнува во предлогот.
Предложените законски решенија се во насока на обезбедување на поголема финансиска и оперативна независност на Државниот завод за ревизија, преземање мерки по однос на препораките дадени од овластениот државен ревизор, како и разгледување на конечните ревизорски извештаи од страна на Собранието на Македонија.
- Согласно Извештајот на Европската комисија за напредокот на земјата за 2022 година, во рамки на Поглавјето 32 - Финансиска контрола, констатирано е дека, Законот за државната ревизија во голема мера е усогласен со стандардите на Меѓународната организација на Врховни ревизорски институции (ИНТОСАИ), но потребно е дополнително усогласување на правната рамка со ИНТОСАИ-П1 Декларацијата од Лима и ИНТОСАИ-П10 Декларацијата од Мексико за независноста на Врховните ревизорски институции во насока на подобрување на функцијата на надворешната ревизија во јавниот сектор, како и зголемување на финансиската и оперативната независност на Државниот завод за ревизија – се истакнува на веб платформата ЕНЕР, каде веќе е поставен нацрт законот и каде можат да се видат одредбите, или пак да се посочат нови решенија за одредени аспекти од законот.
П.О.