Ќе се стигне ли за Викендот без ДДВ? Само пет дена за гласање
Објавено во: Економија 05 Октомври, 2020
Владата го утврди предлог – законот за изменување и дополнувањe на Законот за враќање на дел од данокот на додадена вредност на физичките лица, вчера вечерта. Пратениците мора да ги усвојат измените за четири дена или до 9 октомври и измените да излезат во Службен весник, за да може да настапи „Викенд без ДДВ“ проект кој Владата го планира за 10, 11 и 12 октомври.
Владата синоќа извести дека со измената и дополнувањето на Законот за враќање на дел од данокот на додадена вредност на физичките лица за време на вонредна состојба се создава можност физичките лица кои се пријавени и се корисници на апликативниот софтвер на Управата за јавни приходи преку која се пријавуваат фискалните сметки, со цел враќање на ДДВ-то за фискалните сметки издадени на 10,11 и 12 октомври да им се врати целиот износ на данокот на додадена вредност.
„Заради поттикнување на прометот на домашни производи и услуги како заради зголемена дигитализација на нашето општество враќањето на целиот износ на ДДВ-то ќе се однесува за прометот на домашни производи и услуги како и за компјутерска опрема кој не надминува 30 000 денари по лице за сите фискални сметки издадени на 10,11 и 12 октомври 2020 година, стои во соопштението од Владата.
Дали ќе се стигне, ќе стане јасно веќе од денеска. Претходно премиерот Зоран Заев рече дека оваа мерка треба да опфати повеќе од 350.000 граѓани, корисници на апликацијата „МојДДВ“. Тие за време на продолжениот викенд на 10-11-12 октомври ќе можат да купат домашни производи и услуги или компјутери и друга ИТ опрема во вредност од најмногу 30.000 денари. Повратот на целиот платен ДДВ ќе го добијат назад во рок од неколку дена на своите сметки.
Со ова мерка се проектира да се направи промет од 170 милиони евра, а кон граѓаните ќе бидат вратени околу 17 милиони евра, од повратот на ДДВ.
Што треба да знаете за викендот без ДДВ?