Кипар бара излез од кризата

Добивај вести на Viber

Кипар бара директна докапитализација на банките со пари од постојаниот спасувачки фонд на еврозоната, пренесува Ројтерс. Министерот за финансии на Кипар, Васос Сиарлис соопшти дека владата би сакала долговите, кои ќе се акумулира како последица на докапитализација на финансиските институции, да бидат преземени од Европскиот механизам за стабилност, кога тој почне да дејствува. Ова прашање ќе биде клучно во преговорите меѓу Кипар и меѓународните кредитори за спасувачка помош, додаде Сиарлис. Земјата побара помош од Европската унија и Меѓународниот монетарен фонд (ММФ) поради пропаѓањето на банкарскиот сектор. Банките во Кипар се тесно поврзани со Грција, а  проблемите таму предизвикаа сериозна штета на малата островска држава. Според проценките на аналитичарите за докапитализација на кипарските банки ќе бидат потребни 15 милијарди евра. Тоа е речиси колку големината на бруто домашниот производ на земјата и покренува сериозни прашања за одржливоста на нејзиниот долг. Пред два дена рејтинг агенција „Standard & Poor's“ го намали кредитниот рејтинг на Кипар од ББ до Б со негативен знак,  што значи дека оценката може да биде и дополнително намалена во следните месеци.