Каде потфрли здравствениот систем во Македонија: Се чека анализата од клиниките за високата смртност од ковид
Објавено во: Македонија 25 Септември, 2020
Во текот на
следнава недела здравствените власти најавија дека ќе ја објават анализата за
високата смртност од корона вирусот во Македонија. Со 712 починати од почетокот
на епидемијата, земјава е на врвот по процентот на смртност од останатите земји
во регионот. Иако податоците покажуваат дека во Бугарија има 779, во Босна 802,
како и во Србија 745 случаи, што е повеќе од кај нас, сепак тоа се земји со
многу повеќе население, па и стапката на смртност е далеку пониска од онаа кај
нас. Од почетокот на епидемијата во земјава бројот на заразени достигна точно
17.200, па процентот на смртност во Македонија во моментов изнесува 4,14 отсто.
Каде потфрли Македонија е прашањето кое го поставува јавноста, а додека нема конкретни податоци од клиниките и од болниците каде се лекуваат пациентите болни од корона вирусот, здравствените власти велат дека постојат повеќе причини.
Според матичните лекари, проблемот е и во алгоритмот за тестирање. Велат дека и покрај тоа што имале пациенти кои наведувале симптоми на болеста, не успевале навреме да им закажат тестирања, па здравствената состојба кај дел од нив се компликувала до степен кога веќе е предоцна да се спаси живот.
-Ние сме во постојана комуникација со нашите пациенти. До скоро тоа беше само по телефон, но пациентите не известуваа дури и за најмала промена на нивната клиничка слика. Сепак имаше случаи кои не ги исполнуваа критериумите во алгоритмот за тестирање, а подоцна беше констатирано дека се позитивни на вирусот, велат матичните лекари со кои разговараше Фактор.
Истовремено, директорот на Центарот за јавно здравје, епидемиологот Александар Стојанов вели дека една од причините е и тоа што во екот на епидемијата, голем дел од болните криеја дека се инфицирани, па по долго лекување во домашни услови, во најтешка состојба бараа помош во болниците.
-За ова дефинитивно треба да проговорат клиничарите. Но, она што јас со сигурност можам да ви го потврдам дека сите пациенти кои беа хоспитализирани и кои се уште се примаат на лекување во болниците беа третирани според сите протоколи за лечење од корона вирусот. Како проблем би можел да го издвојам тоа што во болничките установи нема одделенија за интензивна нега. Има само на Клиниката за инфективни болести и во ГОБ „8 Септември“, заради што и најголемиот број пациенти се носеа токму таму. А и самиот транспорт претставува дополнителен ризик. Ист така можам да кажам дека најмала смртност има во земјите кои имаат силни здравствени системи, но тоа се држави со децении наназад вложуваат во сите здравствени капацитети. Ние чекаме донации, за жал од донациите не може да се изгради јак здравствен систем. Освен Германија која е далеку пред нас, како пример би ја издвоил и Словенија. По распадот на Југославија, Словенија почна да издвојува 5 отсто за здравствениот систем, кај нас само 2 осто, па не нормално е да немаме силен здравствен систем, вели д-р. Стојанов за Фактор.
Анализата за смртноста која треба да биде објавена во текот на наредната недела, како што најави и министерот за здравство, Венко Филипче, ќе содржи детални податоци за возраста, за коморбидитетите на починатите пациенти, за тоа кога се јавиле во болница, односно дали побарале помош кога е предоцна...
Инаку, за сега ќе остане запаметен 2 јули, кога во Македонија беше регистриран највисокиот број на починати, односно имавме 15 смртни случаи од Ковид-19.
Анита Буховски