КАБИНЕТ НА ВУЧИЌ: Поради бруталноста на Курти вооружените сили на Србија остануваат на највисоко ниво на борбена готовност

Добивај вести на Viber

Совет за национална безбедност информираше дека српската војска останува во состојба на борбена готовност. 

Во зградата на Генералниот секретаријат на претседателот на Србија денеска се одржа седница на Советот за национална безбедност посветена на последните случувања во Косово, објави N1.

„Поради бруталната употреба на сила од страна на Албин Курти и неговите сили против српскиот народ на Косово и Метохија, вооружените сили на Република Србија остануваат на највисоко ниво на борбена готовност до понатамошно известување, беше договорено на состанокот на Советот за национална безбедност“, стои во соопштението од Кабинетот на претседателот на Србија, Александар Вучиќ.

Нагласено е дека КФОР/НАТО не ја извршиле својата работа во согласност со Резолуцијата 1244 на Советот за безбедност на Обединетите нации и Воено-техничкиот договор од Куманово.

Началникот на Генералштабот на српската армија, генерал Милан Мојсиловиќ, е овластен да одржува директен контакт со командантот на КФОР, во обид да се гарантира дека КФОР/НАТО ја исполнуваат својата функција и мандат, во согласност со релевантните акти на ОН и заштита на косовските Срби.

НАТО повика на деесскалација, откако вчера граѓани во северно Косово се судрија со полицијата. Градоначалниците со полиција влегоа во општините. На изборите победија кандидати од албанска националност, затоа што Србите ги бојкотираа изборите. 

Утрово е мирно во северно Косово.