Добивај вести на Viber
Одлуката на Русија да се откаже од изградбата на гасоводот Јужен тек, има огромни геополитички и економски последици за целиот балкански регион, кој се надеваше да се најде на трасата за експорт на руски гас кон Европа.
Со последните планови на официјална Москва, наместо Јужен тек, кој требаше да транспортира гас по дното на Црното Море и преку Бугарија, се поизвесна е друга варијанта - продолжување на гасоводот Син тек кон Турција, со што природниот гас би бил пренасочен преку територијата на Турција и Грција.
Рускиот претседател Владимир Путин вчера веќе најави дека за оваа цел Русија е подготвена да изгради огромно складиште за гас на турско-грчката граница. Од оваа траса, одредено количество природен гас би можело да стигнува до земјите од Европската унија, но и до оние од Југоисточна Европа.
Но, долгорочно, одредено количество гас ќе се пренасочи во коридор кон Блискиот Исток, што ќе ја промени геополитичката и економската слика на Југоисточна Европа, велат аналитичарите. Ако со Јужен тек клучна улога се очекуваше да има линијата Бугарија-Србија-Унгарија-Словенија-Австрија-Италија, сега главен играч ќе стане Турција и нејзиниот „непредвидлив“ претседател Реџеп Тајип Ердоган познат по политиката на оддалечување од ЕУ и западните земји, проценуваат експертите.
Дополнително, во линијата за снабдување на Југоисточна Европа со важниот енергенс, се зголемува значењето и на Грција, чија територија ќе биде единствена рута за пренос на гасот кон балканските земји.