Јавниот долг на Македонија продолжува да расте и покрај предупредувањата
Објавено во: Економија 07 Октомври, 2015
Неправилности, лоши практики во спроведувањето на јавните политики и трошењето на јавните пари, забележува во својот септемвриски билтен „Транспарентност Македонија“.
Според извештајот долгот на јавниот сектро речиси двојно се зголемил и покрај многубројните предупредување тој да се намали.
– Според септемврскиот извештај на Меѓународниот монетарен фонд (ММФ), долгот на јавниот сектор речиси двојно се зголемил, достигнувајќи 43,3 проценти од БДП во 2014 година, односно надворешниот долг на земјата достигнал речиси 70 процоенти од БДП, како одраз на задолжувањата на јавниот сектор и зголемувањето на долгот во компонентата на странските директни инвестиции. Извештајот на Светска банка, исто така, предвидува дека долгот на јавниот сектор во земјата до 2016 година, ќе се искачи до 49 проценти од БДП. Токму затоа, ММФ препорачува да се намали со темпото на трошење на јавните пари во наредниот период за да се обезбеди намалување на дефицитот во буџетот под 3 проценти од БДП, во согласност со среднорочната фискална стратегија и овозможување на одржливост во фискалните правила – велат од „Транспарентност“.
Од институцијата укажуваат и на проблемот со постојаното зголемување на вработените во јавниот сектор каде има повеќе од 185 000 луѓе. Покрај зголемените работни места, предвидено е зголемување на платите за администрацијата, со што вкупниот трошок за плати на јавната администрација достигнува речиси 2,3 милијарди евра.