Извршители биле кај Дескоска и постигнале договор

Добивај вести на Viber

Извршителите, кои се често на удар на критиките од јавноста, ја посетиле министерката за правда Рената Дескоска за да направат последни консултации пред Измените на Законот за извршување, со кои треба да се намалат наградите и каматите на фелата.

Претседателот на комората на извршители Зоран Димов сега вели дека измените ќе бидат во полза на граѓаните иако во последно време приходите на сите извршители биле во драстичен пад.

- Во Македонија има 98 извршители, а приходите кај сите извршители се драстично паднати. Точна сума не знам, тоа е предмет на секоја завршна сметка, но ви гарантирам дека се драстично паднати – изјави Димов.

Тој истакна дека извршителите досега не можеле да знаат кои физички лица се социјални случаи за да бидат изземени од системот на блокада.

– Ова ќе биде решено во рамките на Законот за извршување. Треба да останеме ефикасни, бидејќи од Законот за извршување не можат да се изземат доверителите, а должниците да не ги добијат своите социјални права. Ние имаме увид во тоа дали одредено лице е корисник на социјална помош, и тоа лице нема да биде предмет на извршување. Ќе има промени и кај оние категории граѓани што се со минимални плати, и кај нив да има намалување. Таму има граѓани за побарувања што потекнуваат од 1990-тите години, за кои извршителите не се виновни, тие предмети ги наследивме – рече Димов.

Вели дека досега на доверителите им биле вратени средства во вредност од една милијарда евра.

Предлог-законот е во собраниска процедура и во наредниот период треба да биде усвоен, а потао ќе се разгледуваат подзаконските акти на истиот со кој ќе се регулираат тарифите.

- Потоа ќе има носење подзаконски акт, кој се однесува на тарифата на извршителите, се надевам дека ќе добиеме поддршка од Комората на извршители во процесот на намалување на трошоците зашто навистина е недозволиво граѓаните да плаќаат за долг што го направиле пред повеќе години по дваесет пати повеќе од основниот долг – рече Дескоска.

Освен кај извршителите и нотарите, некои невладини организации бараат да се намалат и трошоците кај банките за блокирање и одблокирање сметки што влегуваат во делот на извршување, но некои извршителите имаат проблеми со блокирање сметки на социјални случаи и бараат измени во Законот за платен промет, каде што социјалната помош ќе стигнува само на една сметка и таа да не може да биде блокирана.

– Ние ставивме во законот дека ако дојде до блокирање сметка на лице што било изземено од извршување, односно приход што не смее да се извршува (дали се социјални случаи, дали е алиментација или хуманитарна помош), во тој случај ниту банките ниту извршителитe нема да смеат да наплатат надоместоци – појаснува министерката Дескоска.