ИЗВЕСНА ПРИВАТИЗАЦИЈА: Галеника оди во раце на Aelius -за 16 милиони евра и отплата на долгови
Објавено во: Балкан 27 Октомври, 2017
Приватизацијата на Галеника е се поизвесна.
Оваа компанија оди во раце на Aelius од Луксембург.
Медиуми од регионот повикувајќи се на Министерството за економија на Србија пишуваат дека оваа компанија од Луксембург понудила 16 милиони евра за купување на 93,7 отсто од вкупниот капитал на Галеника, по отворањето на финансиката понуда на тој понудувач.
Како што е соопштено, Комисијата констатирала дека понудата е поднесена согласно со јавниот повик и дека ги исполнува сите пропишани услови, и донела Одлука со која му предлага на Министерството за економија Aelius да го прогласи купувач на капиталот.
Aelius, е единствен учесник кој ги исполнил сите услови за учество во процесот на приватизација на Галеника.
Како се додава, купувачот ќе има обврска, покрај износот од 16 милиони евра на име на купопродажната цена, да уплати и износ од 25 милиони евра на име подмирување на обврските кон банките, како и износ од дополнителни 200 евра по година на стаж за вработените кои се определиле за доброволен социјален програм.
Исто така, купувачот има обврска во наредните две години на име задолжителни инвестиции да вложи 5,525 милиони евра во Галеника, како и бројот на вработени на неопределено време да не го спушта под 900.
Министерството за економија на Србија на 1 септември распиша тендер за продажба на 93,7 отсто капитал на Галеника, а почетната цена на јавното наддавање е едно евро со обврска купувачот да уплати и 25 милиони евра за покривање на банкарските долгови на таа компанија.
За доброволно заминување од Галеника која има 1400 вработени, се пријавиле 250 работници.