Изборите во Холандија - на хартија и без ИТ системи

Добивај вести на Viber

Подобро безбедно отколку да жалиме. Тоа е водечкиот пристап на холандската влада за справување со стравот од руски хакерски напади за време на претстојните избори. Речиси 13 милиони гласачи во земјата ќе се наредат на 15 март пред 9000 избирачки места, за да го заокружат полето за фаворитот, а потоа овие гласови ќе бидат преброени на рака.

Тоа е еден од драстичните одговори на заканата, која што загрозува и други две европски земји, каде што ќе се одржат избори оваа година - Франција и Германија, пишува интернет изданието politico.eu.

Електронското гласање во земјата е проект од 2006 година, но владата се откажа, бидејќи во информативниот систем, за известување на гласовите, беа откриени доста неточности и ранливи места. Сега, десет години подоцна не е направен систем кој ќе биде доволно безбеден за известување и пребројување на гласови. Откако САД ја обвини Русија за хакирање за време на претседателските избори минатата година, Холандија најави дека електронското гласање отпаѓа.

„Не сакам да има и капка сомнеж врз резултатот“, рече министерот за внатрешни работи Роналд Пластерк, цитиран од весникот. Според него тој не сака и да замисла дека некој може да се посомнева во резултатите.

Холандските власти стравуваат од руска интервенција по години на тензиите со Москва по случајот со паднатиот авион на малезиската авиокомпанија во 2014 година  во источна Украина, во кој загинаа 298 лица, повеќето од нив холандски државјани.