Ивент индустрија – сигурен или ризик бизнис?!?

Добивај вести на Viber

Колкави се можностите за развој на бизнис во ивент индустријата и опстојување на истата во Македонија не постојат прецизни анализи. Иако е се поголем бројот на компании кои се решаваат да ги користат услугите кои ги нуди оваа индустрија сигурност за развој и опстојување не гарантира никој. "Тешко е да се зборува за сигурен бизнис кога владее глобална криза и секојдневно пропаѓаат бизниси. Сепак Македонија е пазар кој ако добро го познаваш шансите за да опстанеш се поголеми", вели Милан Тодевски, сопственик на „Event Management Solutions“. Светските истражувања покажуваат дека во оваа сфера опстојуваат оние кои добра ја познаваат индустријата, оние кои се добри играчи на пазарот но најважно од се оние кои вложуваат во техничка опрема. "Прилагодливоста игра голема улога во ивент индустријата, ако знаете да се прилагодите и да играте според трендовите кои се наметнуваат од светот и постојано нудите нешто ново и креативно можностите за опстојување се многу поголеми. Но ако не знаете да се прилагодите кон барањата на клиентите подобро и да не влегувате во овој бизнис", додава Тодевски. За ивент индустријата клучни се искуството, тимот од професионални инженери и техничари, вложувањето во опремата и добрата поставеност на пазарот. Во Македонија настани кои главно се организираат со помош на специјализирани компании се конференции, презентации и семинари, концерти, свадби, корпоративни настани и тим билдинг. Ивент менаџментот подразбира целосна организација на настаните од идеја и концепт, изнајмување на комплетна опрема (бина, озвучување, осветлување, шатори...) до промоција и анализа за успешноста на настанот и проектот.