Иванов за „Винер Цајтунг“ : Правно неиздржано е да се формира влада без определен мандат
Објавено во: Македонија 15 Април, 2017
Претседателот Ѓорге Иванов, во интервју за австрискиот дневен весник „Винер Цајтунг“ вели дека правно неиздржано е да се формира влада без определен мандат.
Додава дека таквата влада би била без легитимност од претседателот, односно без уставна основа.
Прашан за евентуална можност да се бира Влада во Собранието, без определен мандат од страна на претседателот, Иванов со став дека тоа е правно неиздржано.
„Тоа е само желба. Тоа е правно неиздржано. Таква влада нема да има легитимитет. Ова јасно е наведено во нашиот Устав. Согласно член 90 од Уставот, само претседателот на државата може да го определи мандатот за состав на Влада. Во таков случај би имало две влади. Актуелната, која е техничка влада, и влада која што е без легитимност од претседателот, односно без уставна основа. Значи ќе влеземе во уште поголема криза“ - изјави Иванов.
Во интервјуто, претседателот Иванов објаснува дека од прогласувањето на независноста на Република Македонија, секогаш прво пласираната партија на изборите го добивала мандатот за составување на Влада.
За тоа што ќе се случи доколку некогаш се избере претседател на Собрание, а шефот на СДСМ повторно се договори со партиите на македонските Албанци и посака да состави Влада, Иванов со став дека на таква коалиција нема да го даде мандатот.
Шефот на државата како пречка ја наведува Тиранската платформа.