Добивај вести на Viber
Лидерот на српските радикали обвинет за воени злосторства во Хаг Воислав Шешељ побарал од Босна и Херцеговина да му обезбеди исплата на инвалидска пензија, а како што стојат работите веројатно тоа и ќе го добие, бидејќи препорака за ваква одлука дале лекарски комисии и во Србија и во Федерацијата БиХ, пренесува „Дневни аваз“.
Шешељ во 80-тите години на 20-от век беше вработен како асистент на Факултетот за политички науки во Сараево. Таму заради националистичко делување доби отказ и потоа се пресели во Белград каде што ја продолжи политичката кариера.
Врз основа на овој предвоен работен стаж во БиХ, сега Шешељ поднел барање за инвалидска пензија, а наодите од Белград му потврдуваат дека тој е инвалид од прва категорија.
Согласно прописите, дијагнозата на белградските лекари мораше да ја потврди и Институтот за медицински вештачења на зцдравствената состојба во Федерацијата БиХ, а експертите на оваа институција врз основа на документацијата од Белград го потврдиле неспорниот инвалидитет на обинетиот за воени злосторства, иако немале можност да го прегледаат.
„Тоа усогласување во сите земји се прави без преглед. Се потврдува само врз основа на дијагноза и документацијата која ќе се достави“, вели директорот на Институтот Зијад Хаџиомеровиќ, кој потврдува дека Шешељ доставил многу обемна документација, но за нејзината содржина не може да зборува бидејќи тие податоци се заштитени со закон.
Лекарските власти во Федерацијата БиХ велат дека апликацијата била поднесена уште во времето додека Шешељ уште бил во Хаг, а тие ја изработиле професионално без воопшто да се водат од името и презимето на подносителот.