Има ли злоупотреба на државни пари преку Фондот за иновации: ОЈО почнува истрага
Објавено во: Економија 23 Јули, 2018
Основното јавно обвинителство за гонење организиран криминал и корупција оформи предмет по допрен глас по пишувањата во медиумите за доделувањето на државни пари преку Фондот за иновации и технолошки развој.
„По објавите за евентуални злоупотреби при доделување на грантови по Јавен повик од Фондот за иновации и технолошки развој, ја известуваме јавноста дека Основното јавно обвинителство за гонење на организиран криминал и корупција оформи предмет по допрен глас. Обвинителството презема дејствија за утврдување на факти во предметот, а во врска со евентуални сторени кривични дела во постапката по јавен повик за финансирање проекти во рамки на третиот столб од Планот за економски раст – прв инвестициски бран, стои во објавата од ЈОРМ.
Истрагата треба да покаже дали има индиции за злоупотреба. Медиумите објавија дека фирми блиски до власта добија пари од Фондот. Оттаму се правдаа дека немале увид во акционерската структура на фирмите апликанти, а дека селекцијата ја вршеле странски експерти.
Фото: World Summit Awards