ИЛИЈА ДИМОВСКИ - Македонија доби бинационална Влада, а 10 отсто од граѓаните се од помалите етнички заедници
Објавено во: Македонија 31 Август, 2020
Поранешниот пратеник од ВМРО-ДПМНЕ, Илија Димовски, тврди дека земјава добила бинационална Влада.
„Македонија доби бинационална Влада...
За прв пат после децении, Република Македонија доби Влада во која членуваат само министри Македонци и Албанци...
Прв пат во македонската Влада, нема НИТУ ЕДЕН министер Турчин, Ром, Србин, Влав или Бошњак...“, пишува Димовски на фејсбук.
Вели дека според пописот во 2002 (тој е последен), околу 10 отсто од граѓаните на Република Македонија се припадници на помалите етнички малцински заедници...
Нивното значење во градење на државата Македонија е големо и забележливо уште од првото заседание на АСНОМ...
„Овие етнички малцински заедници секогаш и секаде биле горди и лојални граѓани на Република Македонија...
Покрај многуте политички слабости и ризици по државата, јас одбрав да ја потенцирам оваа критична точка, затоа што има најголем ризик по политичката иднина на државата Република Македонија...
Жалам што овој елемент на суштинска слабост на Владата, или намерна поставеност, не доби на поголемо внимание минатите денови...
Партиите на помалите етнички заедници што и понатаму, во вакви околности, ќе останат во лојална коалиција со СДСМ докажуваат дека имаат дефицит на политичка сила за вистинско застапување на своите членови и гласачи...“, пишува поранешниот пратеник.
Димовски со порака и до својата партија, ВМРО-ДПМНЕ, која останува во опозиција.
„Од висок државен интерес е ВМРО-ДПМНЕ да понуди политичка платформа за интеграција на интересите на граѓаните припадници на помалите етнички (па и културолошки) заедници кон својата борба за еднакви права на сите граѓани, а со тоа и зачувување на унитарниот карактер на државата и мултикултурниот карактер на општеството...“, нагласува Илија Димовски.