Добивај вести на Viber
Хрватскиот пензиски систем се наоѓа пред колапс, а соодносот меѓу работниците и пензионерите падна под 1:1 и сега изнесува 0,88:1, објавува хрватски „Јутарњи лист“.
Тоа значи дека помалку од еден вработен издржува еден пензионер. Хрватскиот министер за труд и пензиски систем Мирандо Мрсиќ оценува дека на Хрватска и се потребни дури 2,5 милиони работници за ефикасно да се исплаќа постојната маса на пензии.
Податоците со кои оперира хрватското Министерство предвидуваат сооднос меѓу работниците и пензионерите од 1,2:1, но според весникот во последниот период оваа ситуација е значително влошена.
Влошувањето, освен со падот на бројот на вработени, дополнително е поттикнато и со непрекинат раст на бројот на пензионери од година во година. Стареењето на популацијата се претвора во очигледен проблем, кој предизвикува сериозна неодржливост на пензискиот систем.
Податоците стануваат уште поалармантни ако се знае дека до 1950 година во Хрватска за пензијата на еден пензионер работеле дури девет работници. Во 1960 година тој број е преполовен, во 70-тите соодносот стагнирал, а од тогаш постојано паѓа до сегашните 0,88:1.