Добивај вести на Viber
Хрватското министерството за финансии и Царинската управа денеска ги претставија новите предлог измени за акцизите и останатите даноци кои треба да се усогласат со европските регулативи. Иако ниту министерот за финансии Славко Линич, ниту пак неговите колеги не посочија конкретни бројки, беше соопштено дека се очекува акцизата за кафе и за безалкохолни пијалаци да биде намалена, со што ќе падне и цената на овие производи, а треба да се приближи до земјите од регионот.Ова се прави со цел парите да се задржат во Хрватска, наместо нивните граѓани да ја минуваат границата во потрага по поевтини намирници.
Што се однесува пак до цигарите и останатите производи од тутун, тие дополнително ќе поскапуваат во следните три години.
Иако директивата на ЕУ бара воведување на акциза на природен гас и електрична енергија, граѓаните ќе бидат ослободени од такви даноци. Така, електричната енергија и природниот нема да добијат акцизи. Дополнителни оданочувања нема да има ниту за гориво кое се користи од страна на домашните превозници и во поморскиот сообраќај, но затоа сите приватни излетнички бродови мора да плаќаат акциза на гориво. Истото важи и за воздушниот сообраќај - акциза на гориво ќе плаќаат само приватните авиопревозници.
Интересно е и тоа што ќе биде укинат посебниот данок на луксузни стоки, како што се накит, облека и обувки, бидејќи, како што велат од Министерството за финансии, од овие даноци немало значителен приход туку само дополнително се намалувала конкурентноста на домашните производители.
Автомобилите ќе поевтинат, посебно половните, но колку точно, сеуште не е познато бидејќи се чека на конечниот список со новите законски измени.Познато е дека ќе се фаворизираат помалите автомобили и оние автомобили кои испуштаат помалку СО2.