Добивај вести на Viber
Кина ќе гради свој Холивуд. Имено, кинескиот милијардер Ванг Џијанлин и конгломератот „Ванда груп“ денеска започнаа многу амбициозен проект во источнокинескиот град Чингдао. Проектот ќе се вика „кинески Холивуд“, а на почетокот на работите присуствуваа бројни филмски ѕвезди.
Модерниот комплекс со површина од 376 хектари ќе почне со работа во 2016 година, а во него ќе бидат инвестирани 8,3 милијарди долари. Наречен „Ориентална метропола на филмот“ (Oriental Movie Metropolis), филмскиот комплекс се наоѓа во предградието на пристанишниот град Чингдао, инаку познат по пивото.
Ќе опфаќа 20 студија, меѓу кои и „најголемото студио на светот“, со површина од 10.000 метри квадратни. Филмската метропола ќе произведува „најмалку стотина филмови годишно“, како и триестина странски филмови, тврдат инвеститорите.
На гала свеченоста присуствувале многу кинески филмски ѕвезди, меѓу кои Џанг Зији (Мемоарите на една гејша), но и странски глумци како Никол Кидман, Леонардо Ди Каприо, Џон Траволта, Кетрин Зета Џонс…