Грција со осуди за албанскиот национализам

Добивај вести на Viber

Шефот на грчката дипломатија,  Никос Коѕиас, во интервју за националната телевизија ЕРТ, истакна дека Грција, како економски најмоќна земја на Балканот, без разлика на кризата, има потенцијал со нејзината силна дипломатија да се справи со национализмот кој е во пораст во некои земји во регионот. 

Ова се однесуваше за соседна Албанија. 

„Албанија верува дека ќе ѝ биде гарантирано отворање на преговорите за влез во ЕУ без никакви услови. Но, таа не смее да си игра со национализмот и нејзините претставници не треба да искажуваат несериозни работи. Ние ги потсетивме на овој факт“– изјави Коѕиас.

За палењето на грчкото знаме во Дропул пред четири дена, Коѕиас рече дека Грција ги осудува овие изолирани инциденти, но дека на овие настани не треба да се даде значење во надворешната политика.

„Суштината на проблемот во Албанија е што ние од нив треба да бараме владеење на правото, борба против трговијата со дрога и организираниот криминал. Мора да му се признаат правата на грчкото малцинство што живее во Албанија и да престанат игрите со имотите. Ова се услови што ги бара ЕУ исто така“ – вели Коѕиас.

Додава дека Грција е земја која бара решение на проблемите со своите соседи, но дека ова треба да се направи врз основа на интернационалното и европското право.

Грчкиот министер за одбрана, Панос Каменос го осуди како недозволиво однесувањето на седум нови војници со албанско потекло во армијата, кои пред неколку дена објавиле фотографија на социјалните мрежи, на која со раце го формираат албанскиот орел, пишува весникот „Та неа“.

Тој изјави дека таквото однесување во армијата нема да биде дозволено, при што наредил темелна истрага и санкционирање.