Грција го испрати својот прв амбасадор во историјата во Македонија

Добивај вести на Viber

Димитрис Јанакакис е првиот амбасадор во историјата кој Грција го испраќа во Скопје, откако денеска дипломатот му ги предаде акредитивните писма на претседателот на Македонија, Стево Пендаровски. Новата страница се испишува со воспоставувањето на дипломатски односи на Македонија и Грција на ниво на амбасади по потпишувањето на Преспанскиот договор.

„Денес отвораме ново поглавје во билатералните односи со Грција, амбасадорот Димитрис Јанакакис ги предаде акредитивните писма како прв амбасадор на Република Грција во Република Северна Македонија. Подготвени сме за изградба на партнерски однос како што доликува на две соседни земји што споделуваат евро-атлантски вредности, во интерес на граѓаните на двете земји и нивната благосостојба“, објави Пендаровски.

Како што соопштија од неговиот кабинет, Пендаровски истакна дека овој чекор се должи, пред сè, на посветеноста на двете држави кон градењето добрососедска политика заснована врз принципите на меѓусебна доверба и транспарентност.

– Во таа насока особен приоритет треба да има реализацијата на конкретните регионални проекти за подобрување на железничкото, патното и енергетското поврзување, комуникациите, туризмот, економската размена, протокот на луѓе, идеи и на сите оние области предвидени во Акцискиот план за збогатување и унапредување на економската соработка што го потпишаа премиерите на двете земји – рекол претседателот.

Македонија сепак не е непозната за Јанакакис, кој претходно ја вршел должноста шеф на грчката канцеларија за врски во Скопје.  Имајќи предвид дека настапи нова ера, рекол амбасадорот Јанакакис, соработката и синергијата меѓу нашите две држави сега можат и мораат да бидат дополнително засилени во сите области од заемен интерес, а со Договорот од Преспа и усвоениот Акциски план, поставена е широка рамка за соработка во многубројни области во кои веќе се потпишани и низа договори и меморандуми за разбирање.