ГРЧКИ ИНТЕЛЕКТУАЛЦИ: Со Договорот од Преспа се затвора една рана

Добивај вести на Viber

Грчки интелектуалци даваат поддршка на Договорот од Преспа. 

Со поддршка за овој договор денеска излегоа околу 250 грчки интелектуалци и уметници, кои го ставија својот со потпис на Инцијативата за Договорот од Преспа на луѓето од уметноста и културата.

Тие тврдат дека со Договорот од Преспа се затвора една рана, еден спор од три декади. За нив овој договор е светла точка. 

Се заштитува иднината на граѓаните на двете земји, преку мир, солидарност и соработка, се нагласува во Иницијативата за поддршка, јави АНА-МПА, пренесува МИА.

„Сложеното име со географска одредница (Северна Македонија) за севкупна употреба и со ревизија на Уставот, целосно ја покрива грчката позиција и истовремено во пракса ја демонстрира волјата на соседната земја за мирна коегзистенција на граѓаните на двете држави“, се вели во иницијативата.

Грчките интелектуалци нагласуваат дека живееме во време кога во Европа се случува подем на екстремната десница и национализмот.

Велат дека тие секојдневно се во дијалог со општеството преку уметноста, со песни, музика, поезија, театар, танц, пишување, размислување, кино, преку сите можни човечки начини на изразување, со цел „да допреме до луѓето кои се на тест од оваа криза на поделби во општеството кое боли и кое е болно“.

Дојде време да се видат вистинските факти за Преспанскиот договор,  изјави грчкиот премиер Алексис Ципрас во специјалното видео по повод претстојната ратификација на документот од Парламентот во Атина.

Најголемата грчка опозициска партија, Нова Демократија се закани дека ќе стори што е во нејзина моќ да го спречи усвојувањето на Преспанскиот договор во грчкото Собрание. 205 пратеници се пријавени за збор.