Градоначалниците од Истокот бараат нов датум за локални избори
Објавено во: Македонија 14 Април, 2017
Градоначалниците од Источна Македонија со петиција бараат Заедницата на единиците на локална самоуправа (ЗЕЛС) да покрене измена на Изборниот законик за да се поместат локалните избори.
Тие сметаат дека со измените ќе може да се овозможи нормално и законско функционирање на општините. Во спротивно, по 15-ти мај, сите нивните активности престануваат. Тие наведуваат дека без измените, нема да може да се одговара на барањата на граѓаните, да се управува со блок дотациите, преку кои плата земаат вработените во училиштата и градинките, ниту пак ќе има плата за општинската администрација.
Општините веќе имаат штета од овој правно –политички вакуум, затоа што не можат да продаваат градежно земјиште и останатите тендери, се наведува во петицијата.
Неделава е формирана работна група составена од претставници на ЗЕЛС и од министерствата за правда и за локална самоуправа, кои ќе бараат решение за овој проблем.