Градежната компанија Бауер БГ доби уште една забрана за учество на тендери

Добивај вести на Viber

Една од најголемите градежни компании Баеуер БГ за помалку од четири години по трет пат добива негативна референца објавена од Бирото за јавни набавки и е суспендирана од можноста да учествува на пријавените тендери. Негативната референца ќе трае половина година, според новите законски измени со кои се скратува претходниот рок од година дена, и ќе важи од 5 мај до 5 ноември 2022.

Пред еден месец на управителот на фирмата “Бауер БГ” му беше одреден 30 дневен притвор, а на поранешниот директор на Службата за општи и заеднички работи, Васе Донев, куќен притвор, откако беа осомничени во истрагата за еден дел од случајот”Скопје 2014″, предмет на СЈО. Поконкретно за изградба на фасадата од владината зграда како прескапо платена. Од Обвинителството рекоа и дека е замрзнат имот.

„Ве известуваме дека економскиот оператор Друштво за градежништво,трговија и услуги БАУЕР БГ ДОО Скопје на 05.05.2022 година има објавено негативна референца од страна на договорниот орган Центар за развој на Скопски плански регион Скопје поради следниот основ: Понудувачот не ја прифати исправката на аритметичките грешки од страна на комисијата. Дополнителни информации во врска со издадената негаивна референца (вклучително и за постапката за која истата е добиена) може да добиете директно од страна на договорниот орган кој ја има објавено истата“, ни одговорија од Бирото за јавни набавки, без да се прецизира за каква јавна набавка станува збор.

Негативни референци против Бауер БГ беа изречени во 2017 за тендер на ЈП Државни патишта, а потоа и во 2019 за неиспочитуван договор со Град Скопје.

Градежната компанија стана позната за пошироката јавност за време на владеењето на ВМРО-ДПМНЕ, кога доби многу големи тендери за изградба на јавни објекти, пред сѐ од Градот Скопје на чело со Коце Трајановски. Бауер во 2015 беше најголем добитник на тендери од Град Скопје. 

Пред два месеци Агенцијата за храна и ветеринарство во системот за јавни набавки објави дека е склучен договор за 8 милиони евра со „Бауер“ за изградба на нова административна зграда со лабораториски простории. Зградата треба да се гради во Општина Аеродром. Цената на договорот е 515.202.937 денари. Изградбата треба да биде завршена за две години. Станува збор за работа на површина од 2.655 метри квадратни.

Бауер БГ изминатите година дена доби и други вредни тендери - договор од 43 милиони денари од Град Скопје за реконструкција на булевар Митрополит Теодосиј Гологанов, 108 милиони денари од Министерство за образование за реконструкција на училиштето „Ванчо Питошески“ во Охрид, 66 милиони денари од Министерство за животна средина за изградба на водоснабдителен систем за две села во Делчево, но и други помали.

А.К.