Германија има раст на населението, но Германци има се помалку
Објавено во: Свет 26 Август, 2016
Германија лани имала најголем раст на населението од своето обединување поради приливот на мигранти.
Состојбата е таква поради тоа што 1,1 милион мигранти пристигнаа во земјата минатата година, соопшти денеска Федералната статистичка служба, цитирана од светските агенции.
На крајот на 2015 година, Германија имала 82,2 милиони жители или 1,2% повеќе, односно околу 978 000 луѓе плус во однос на претходната 2014 година.
Тоа е највисокиот раст на населението на земјата од 1992 година, кога тој раст беше 700 000 луѓе.
На крајот на 2015 година во Германија живееле 8,7 милиони странци, што е пораст од 14,7 %, и 73,5 милиони Германци, пад од 0,2%.
Без масовното пристигнување на мигранти, од кои повеќето се од Сирија, Ирак и Авганистан, населението на земјата би требало да се намали.
Соочена со стареење на населението и ниска стапка на наталитет, Германија регистрирала лани 188 000 смртни случаи повеќе отколку раѓања.
Тоа значи зголемување на негативниот природен прираст бидејќи во 2014 година смртните случаи биле со 153 000 повеќе од породувања во земјата.