Фросина Ременски осомничена за „Рекет“

Добивај вести на Viber

Фросина Ременски е функционерот кој е меѓу новоосмничените во случајот „Рекет“ откако денеска Јавното обвинителство објави дека е поднесена наредба за спроведување истражна постапка против пет физички лица и едно правно лице. 

Од обвинителството неофицијално ја потврдуваат оваа информација. 

Оттаму претходно известија дека едно од осомничените лица како функционер, заедно со првоосомничениот присуствувало на средбите организирани од првоосомничениот, при што го искористило својот углед и авторитет и оштетените стекнале впечаток дека зад понудените проекти стои извршната власт.

Првоосомничен е Бојан Јовановски - Боки 13. 

„Врз основа на предистражната постапка обвинителот што раководи со постапката, дојде до сознанија што укажуваат дека во периодот од јули 2017 година до април 2018 година, првоосомничениот како претседател на осомниченото правно лице, искористувајќи документи од правното лице, довел и одржувал во заблуда двајца управители на две друштва за градежништво. Тој, лажно прикажувајќи дека ќе обезбеди државно неизградено земјиште за изградба на центар за возрасни лица и мобилен сервис, а потоа и субвенционирање од страна на државата, од оштетените преку авторска агенција успеал да добие парични средства од 719.905 евра од едното правно лице и 233.821 евра од другото. Останатите осомничени лица со умисла му помагале на првоосомничениот во извршувањето на кривичните дела изготвувајќи договори, подигнувајќи ги уплатените средства и уплаќајќи средства на други правни лица по основ на позајмица или донација, стои во известувањето од кај нив.

Според неофицијални информации новоосмничени се и Јасна Мандиќ, директорка на Меѓународниот сојуз и асистентката на Јовановски кристина Карајованова. 

За случајот осомничена е  специјалната јавна обвинителка Катица Јанева.