(ФОТО+ВИДЕО) Трета ноќ насилни протести во Париз
Објавено во: Свет 30 Март, 2017
Трета ноќ по ред има насилни протести во главниот град на Франција, Париз по убиство на Кинез.
Француските медиуми објавија дека најмалку тројца полицајци се полесно повредени за време на протестите.
Три лица се приведени, а ситуацијата почнала да се смирува кон 23 часот.
Во неделата навечер полицијата интервенирала во една стамбена зграда во 19-тиот арондисман поради „семејна кавга“, а при интервенцијата, Шаојо Лиуа кога ја отворил вратата од домот, со ладно оружје нападнал еден од полицајците. Притоа, друг полицаец веднаш отворил оган и смртно го ранил Шаојо, кој инаку бил татко на пет деца.
Сепак, семејството Лиуа формално ја оспорува верзијата на полицијата и објаснија дека Шаојо со ножици сечел риба кога полицајците упаднале во неговиот стан.
„Околу 20 часот мојата мала сестра слушна дека некој чука на вратата. Погледнала низ прозорот и видела двајца вооружени мажи и една жена. Мојот татко отиде до вратата со ножиците со кои што ја сечеше рибата за вечера. Полицајците во тој момент ја пробија вратата, а мојот татко се најде на подот“- раскажува ќерката на Шаојо Лиуа.
Од француското Министерство за внатрешни работи порачаа дека истрагата за овој инцидент е во тек.
Кина ја повика Франција за подобра заштита „на безбедноста и правата" на своите државјани.