Добивај вести на Viber
Од 28 октомври, најголемиот производител на автомобили во Европа, германскиот “Фолксваген“, ќе се повлече од берзата во Лондон. Како што соопштија од компанијата, ваквата одлука се должи на нискиот обем на тргување со неговите акции. Компанијата ќе ги повлече обичните и повластените акции, а барањето за нивното повлекување веќе е упатено до надзорните финансиски власти во Волсбург, јави Блумберг.
“Обемот на тргување со нашите акции е премногу низок за да ги оправда административните напори кои ги преземаме“, истакнал портпаролот на “Фолксваген“, Марко Далан.
Германската автомобилска компанија презема напори за намалување на трошоците, со цел да го неутрализира падот на побарувачката на европскиот пазар, каде продажбата на новите автомобили паднала на 20 годишен минимум.