Фицо не сака во Словачка да живеат десетици илјади муслимани
Објавено во: Свет 25 Мај, 2016
Словачкиот премиер, Роберт Фицо вели дека неговата земја не е соодветно место за населување на муслимани, затоа што тие би можеле да ги променат нејзините вековни традиции.
Тој смета дека е невозможно интегрирање на бегалците од Блискиот Исток во словачкото општество.
Во интервју за словачката агенција ТАСР, чии делови денеска пренесуваат медиумите во Братислава, тој рече дека не би сакал во Словачка да живеат десетици илјади муслимани.
Фицо досега во неколку наврати изјавуваше дека нема да дозволи муслиманите да создадат компактна заедница во Словачка. Тој претходно има изјавено дека не сака да го следи примерот на Германија, а идејата за мултикултурна Европа ја смета за неуспешна.
Словачка е еден од најжестоките противници на планот на Европската комисија за прераспределба на мигрантите меѓу земјите членки на ЕУ, според утврдени квоти и поднесе тужба против ваквата иницијатива пред Европскиот суд.
Во Словачка постојат само мали муслимански заедници од неколку стотици верници.