Филипче: Вакцинацијата против Ковид-19 една од најголемите логистички операции на здравствениот систем

Добивај вести на Viber

Министерот за здравство Венко Филипче реле дека вакцинацијата против Ковид-19 ќе биде една од најголемите логистички операции на македонскиот здравствен систем и веќе се работи на групите на граѓани за кои ќе има препорака да ја примат оваа вакцина.

„Вакцинацијата со оваа вакцина ќе биде една од најголемите логистички операции која ќе треба да ја спроведе здравствениот систем, за што веројатно ќе ни треба помош и од други сектори - да се примат вакцините, соодветно да се чуваат, да се транспортираат, дистрибуираат до местото каде што ќе се аплицираат на лицата кои претходно ќе бидат селектирани како ризични групи што треба да ја примат вакцината, и ние веќе на ова поле сериозно работиме“, рече Филипче во синоќешното гостување во емисијата „Клик плус“ на ТВ21.

Тој додава дека се ангажирани сите економски оператори за чување и дистрибуирање на вакцините, кои изразиле подготвеност и согласност да го поддржат овој систем.

„Искомуницирани се сите вакцинални пунктови и една американска фондација. Добивме помош со фрижидери со температура до – 70 за вакцината „Фајзер“ единствена којашто е на таа температура, но ние мора да обезбедиме услови и за таа вакцина. Така што сметам дека во делот на прием, во делот на чување на вакцините, дистрибуција до местата каде што ќе бидат аплицирани веќе планот е спремен, но многу веројатно е дека во текот на следната недела ќе организираме и една вежба на терен како тоа ќе изгледа.“- наведе министерот.

Вакцинирањето ќе го спроведат лекари и медицински сестри кои во овој момент не работат со ковид пациенти, а за што ќе биде организирана и обука, но не очекува сите 400.000 нарачани вакцини да пристигнат одеднаш.

„Ние испративме допис и чекаме одговор. Не сум сигурен дека и тие точно знаат заради тоа што првите количини, тоа е суштината на Ковакс механизмот ќе бидат дистрибуирани во сите земји во регионот коишто аплицирале за тој месец. Очекуваме да биде во март месец но не можеме да бидеме сигурни. Кој ќе биде вакциниран е многу важно прашање и препораки се да тоа најнапред бидат дравствените работници, вработените во војската и полицијата, сите јавни службеници, во јавниот транспорт, хроничните болни сите критични групи согласно мислењето на експертите. “ вели министерот.