Фабриката во Сопиште ги имала сите потребни дозволи, повредените и натаму се борат за живот

Добивај вести на Viber

Комисијата за анализа на постапката за давање согласност на фирма за вршење дејност за пиротехнички средства, што ја формираше Министерството за економија веднаш по експлозијата во фабриката за пиротехника ДПТ ИЦЕМАК ДОО во Сопиште, утврдила дека фирмата ги имала сите потребни дозволи и тие биле издадени согласно предвидената процедура. „ДПТ ИЦЕМАК ДОО поседува согласност за вршење промет на вооружување и воена опрема, според донесената Одлука од Владата на Република Македонија, од 11.12.2012 година, согласно Законот за производство и промет на вооружување и воена опрема, при што е запазена процедурата за добивање согласност за вршење дејност. Во документацијата друштвото има и одобрение за производство и промет на пиротехнички производи за временска модификација, забава и обука издадено од МВР на 10.06.2009, согласно Законот за зашита од експлозивни материи и Законот за промет на експлозивни материи, Решение за вршење на дејност – промет на големо со хемикалии во посебен магацински простор, издадено од Министерство за здравство на 17.07.2009, како и Решение за употреба на предметниот деловен објект, издадено од посебно формирана комисија од експерти и претставници од МВР и МО, определена од Општина Сопиште за работилници за производство на пиротехнички производи и администрација“, појаснуваат од Министерството за економија. Во денешниот полициски билтен се наведува дека МВР и натаму презема мерки за утврдување на причините заради кои настанала експлозијата, во која беа повредени четири лица, од кои три потешко. Според МВР, во погонот за производство на пиротехнички материјали додека вработените Ж.А. (59), Д.К. (27), Г.Ј. (39) и З.С. (51) изработувале калапирање на гази во еден момент дошло до искрење на некоја од газите по што настанала експлозија и пожар. Состојбата на тројцата повредени работници, меѓу кои има и една жена, и натаму е исклучително сериозна, потврди и министерот за здравство Никола Тодоров. Двајцата пациенти примени во ГОБ „Наум Охридски“ имаат изгореници од 3 степен на поголема површина од телото и дишните патишта и се приклучени на апарати. Пациентката која е хоспитализирана на КАРИЛ има изгореници од 4 степен. Тодоров посочи дека сите пациенти се под постојан мониторинг и се прават напори за одржување во функција на нивните витални органи.